Boðað hefur verið til Kvennaverkfalls þann 24. október og er meðal krafna Kvennaárs að tekið sé á vanmati á störfum kvenna og launajafnrétti sé tryggt. Gera má ráð fyrir talsverðri umræðu um launamun kynjanna og virðismat starfa í tengslum við verkfallið. Býður því Jafnlaunastofa til samtals með það að markmiði að dýpka skilning á viðfangsefninu.

Áhersla verður á hinn kynskipta vinnumarkað, ólíkar nálganir í umræðu um launamun kynjanna og verðmætamat starfa. Markmiðið er að veita hagnýt verkfæri til að túlka gögn á gagnrýninn hátt, setja tölur í samhengi, skilja kynja- og jafnréttissjónarmiðin að baki og miðla upplýsingum áfram.

Jafnlaunastofa hefur það hlutverk að styðja við launasetningu í þágu launajafnréttis með áherslu á virðismat starfa. Hún er í eigu Sambands íslenskra sveitarfélaga og Reykjavíkurborgar.